“በኢራን ላይ የጀመርነው ጦርነት ከግማሽ በላይ ግቡን አሳክቷል”

መጋቢት 22/2018 (ገበያ ሚዲያ) የእስራኤል ጠቅላይ ሚኒስትር ቤንያሚን ኔታንያሁ በኢራን ላይ እየተካሄደ ያለው ወታደራዊ ዘመቻ ከተቀመጡለት ስልታዊ ግቦች መካከል ከግማሽ በላይ የሚሆኑትን ማሳካቱን አስታውቀዋል።

ጠቅላይ ሚኒስትሩ በትናንትናው ዕለት “ኒውስ ማክስ” ለተሰኘው የአሜሪካ የዜና ማሰራጫ በሰጡት መግለጫ ስኬቱ የተለካው በተከናወኑ ተልዕኮዎች እንጂ በጊዜ አለመሆኑን አብራርተዋል።

ኔታንያሁ በንግግራቸው “ጦርነቱ በእርግጠኝነት ከግማሽ መንገድ በላይ ተጉዟል፤ ነገር ግን የሚጠናቀቅበትን ትክክለኛ የጊዜ ሰሌዳ ማስቀመጥ አልፈልግም” ብለዋል።

የአሜሪካው የውጭ ጉዳይ ሚኒስትር ማርኮ ሩቢዮ በበኩላቸው በነዳጅ ዋጋ መናር ምክንያት በሕዝብ ዘንድ ተቃውሞ እየበረታ ቢሆንም ጦርነቱ ለወራት ሳይሆን ለተጨማሪ ጥቂት ሳምንታት ሊቀጥል እንደሚችል ጠቁመዋል።

እስካሁን ባለው ወታደራዊ እርምጃ በሺዎች የሚቆጠሩ የኢራን አብዮታዊ ዘብ (IRGC) አባላት መገደላቸውን የገለጹት ኔታንያሁ የእስራኤል እና የአሜሪካ ጥምር ኃይል የኢራንን የጦር መሣሪያ ኢንዱስትሪ፣ የኒውክሌር ፕሮግራም እና የሚሳኤል አቅም በከፍተኛ ደረጃ ማዳከሙን አረጋግጠዋል።

ምንም እንኳ የተባበሩት መንግስታት የኒውክሌር ተቆጣጣሪ ተቋም በቂ ማስረጃ ባያቀርብም ኔታንያሁ እና ትራምፕ ኢራን የኒውክሌር መሣሪያ ለመገንባት ተቃርባ ነበር የሚለውን አቋማቸውን በድጋሚ አጽንተዋል።

በመጨረሻም ኔታንያሁ የኢራን መንግስት ከውስጥ ሊፈርስ እንደሚችል ያላቸውን እምነት ገልጸዋል።

ይሁን እንጂ የጦርነቱ ቀዳሚ ዓላማ የመንግስት ለውጥ ማምጣት ሳይሆን የሀገሪቱን ወታደራዊ አቅም ማዳከም መሆኑን ደግመው ተናግረዋል።