ኢራን በእስራኤል የሚገኙ ሁለት ወታደራዊ መሠረቶችን መታች!

የኢራን ጦር ከፍተኛ ዕዝ ባወጣው መግለጫ ሁለት ወታደራዊ መሠረቶችን መምታቱን አስታውቆ ነገር ግን የጀመረውን የማጥቃት እርምጃ ለጊዜው ማገዱን አስታውቋል።

ሆኖም የኢራን ጦር ጥምር ዕዝ ባወጣው መግለጫ እስራኤል በደቡባዊ ሊባኖስ ላይ የምትፈጽመውን ጥቃት የምትቀጥል ከሆነ የበለጠ ከባድ እርምጃ እንደሚከተላት አስጠንቅቋል። 

በአንጻሩ የእስራኤሉ ቻናል 12 ቴሌቪዥን አንድን ከፍተኛ የሀገሪቱ ባለሥልጣን ጠቅሶ እንደዘገበው እስራኤል በአሜሪካው ፕሬዚዳንት ዶናልድ ትራምፕ አስቸኳይ ጥያቄ መሠረት በኢራን ላይ የምታደርገውን ጥቃት ልታቆም እንደምትችል ፍንጭ ሰጥታ ነበር።
 

የአሁኑ አደገኛ ውጥረት ሊቀሰቀስ የቻለው በትናንትናው እለት እስራኤል ያለምንም ቅድመ-ማስጠንቀቂያ የሊባኖስ መዲና በሆነችው ቤይሩት ደቡባዊ የከተማ ዳርቻዎች ላይ ድንገተኛ የአየር ጥቃት መፈጸሟን ተከትሎ ነው። 

ድርጊቱን ያወገዘችው ኢራን ለአጸፋዊ እርምጃ በርካታ የባለስቲክ ሚሳኤሎችን ወደ እስራኤል ወታደራዊ ይዞታዎች የተኮሰች ሲሆን የኢራን አብዮታዊ ዘብ በእስራኤል ውስጥ የሚገኙ ሁለት ወታደራዊ መሠረቶችን መምታቱን አስታውቋል።

እስራኤል በበኩሏ ወዲያውኑ የአየር መከላከያዋን ያነቃች ሲሆን የጦር አውሮፕላኖቿ በምዕራባዊ እና መካከለኛው ኢራን ግዛቶች ውስጥ የሚገኙ ስትራቴጂክ መሠረተ ልማቶችን ኢላማ ያደረጉ ተከታታይ የአየር ጥቃቶችን ሰንዝራለች። 

የእስራኤል መከላከያ ሠራዊት በማህሻህር ከተማ የሚገኝ እና የባለስቲክ ሚሳኤል ማምረቻ ቁሶችን የሚያዘጋጅ የፔትሮኬሚካል ፋብሪካን እንዲሁም ተንቀሳቃሽ የሚሳኤል ማስወንጨፊያ የጭነት መኪናዎችን መምታቱን አረጋግጧል። 

ግጭቱ በሁለቱ ሀገራት ብቻ ሳይወሰን የቀጠናውን አጋሮችም ያሳተፈ በመሆኑ በሊባኖስ የሚንቀሳቀሰው ሒዝቦላህ በደቡባዊ ሊባኖስ በሚገኙ የእስራኤል ኃይሎች ላይ ሦስት ሚሳኤሎችን የተኮሰ ሲሆን በየመን የሚንቀሳቀሱት እና በኢራን የሚደገፉት የሁቲ አማጽያንም በእስራኤል ላይ የሚሳኤል ጥቃት መፈጸማቸውን አስታውቀዋል። 

የሁቲ ንቅናቄ በተጨማሪም ከእስራኤል ጋር ግንኙነት ያላቸው ማናቸውም የባሕር ላይ የንግድ መርከቦች በቀይ ባሕር ላይ ዳግም ኢላማቸው እንደሚሆኑና የባሕር ላይ ትራንስፖርት እገዳ መጣላቸውን አስታውቀዋል። 

የሁኔታውን መባባስ ተከትሎ የአሜሪካው ፕሬዚዳንት ዶናልድ ትራምፕ በማኅበራዊ ገጻቸው የእስራኤል እና ኢራን እርስ በእርስ መታኩስ በአስቸኳይ ማቆም አለባቸው ሲሉ ትዕዛዝ መሰል ጥሪ አስተላልፈዋል። 

ይህ በእንዲህ እንዳለ በጦርነቱ መጀመሪያ ላይ ጥምረት የነበራቸው በፕሬዚዳንት ትራምፕ እና በእስራኤሉ ጠቅላይ ሚኒስትር ቤንያሚን ኔታንያሁ መካከል ያለው ግንኙነት መሻከር ማሳየቱ ይፋ ሆኗል። 

ኔታንያሁ ትራምፕ ጥቃት እንዳይፈጽሙ የሰጡትን ምክር ወደ ጎን በመተው እሁድ ዕለት በቤይሩት ሰኞ ዕለት ደግሞ በኢራን ላይ ጥቃት ማዘዛቸው ትራምፕን ያስቆጣ ሲሆን ሁሉንም ውሳኔዎች የምወሰነው እኔ ነኝ በማለት ኔታንያሁ ላይ ያላቸውን የበላይነት ገልጸዋል።